Aleanca jo-perëndimore: Xi, Putin dhe Kim si simbol i një rendi global të ri

Xi, Putin dhe Kim në krah: Pekini shfaq fuqinë në paradën më të madhe ushtarake të Kinës

Marrëdhëniet mes Rusisë dhe Kinës janë në “nivel të paprecedentë”, deklaroi Vladimir Putin në Pekin, ku u prit nga presidenti kinez Xi Jinping në prag të paradës më të madhe ushtarake që Kina ka organizuar ndonjëherë.

Putin e quajti Xi-n “mik të dashur”, ndërsa mediat shtetërore kineze i përshkruan lidhjet mes dy vendeve si “shembullore”. Në kuadër të marrëveshjeve të reja, Rusia do të rrisë furnizimet me gaz drejt Kinës, ndërsa Pekini do të ofrojë udhëtim pa viza për qytetarët rusë për një periudhë prove njëvjeçare.

Xi pritet gjithashtu të presë liderin e Koresë së Veriut, Kim Jong Un, në një vizitë historike që shihet si demonstrim i unitetit të tre vendeve të akuzuara nga Perëndimi për agresionin në Ukrainë.

“Ne kemi qenë gjithmonë bashkë”

Në takimin në Sallën e Madhe të Popullit, Putin u shpreh se “komunikimi i ngushtë reflekton natyrën strategjike të marrëdhënieve Rusi–Kinë, të cilat janë në një nivel jashtëzakonisht të lartë. Ne kemi qenë gjithmonë bashkë dhe mbetemi bashkë”. 

Nga ana e tij, Xi tha se marrëdhëniet me Moskën “kanë përballuar provat e ndryshimeve ndërkombëtare” dhe se Kina është gati të punojë me Rusinë për “një sistem qeverisjeje globale më të drejtë e të arsyeshëm”.

Këto takime vijnë në një moment kur Pekini kërkon të projektojë fuqinë e vet në skenën ndërkombëtare jo vetëm si superfuqi ekonomike, por edhe si lojtar politik.

Putin, Xi dhe Kim në paradë

Të mërkurën, të tre liderët do të qëndrojnë krah për krah, ndërsa dhjetëra mijëra trupa marshojnë në kryeqytetin kinez për të shënuar 80-vjetorin e dorëzimit të Japonisë në Luftën e Dytë Botërore.

Xi kishte marrë pjesë në maj edhe në festimet e Moskës për përvjetorin e fitores mbi nazistët. Kjo shkëmbesë simbolike nënvizon aleancën e re Pekin–Moskë–Phenian në një kohë kur Donald Trump po përpiqet të gjejë një marrëveshje me Putinin për t’i dhënë fund luftës në Ukrainë.

Aleancë kundër Perëndimit

Në samitin e Organizatës së Bashkëpunimit të Shangait (SCO) në Tianjin, Xi dhe Putin kritikuan hapur Perëndimin. Xi u bëri thirrje vendeve anëtare të “kundërshtojnë mendësinë e Luftës së Ftohtë, konfrontimin e blloqeve dhe sjelljen bullizuese”, ndërsa Putin i hodhi fajin Perëndimit për luftën në Ukrainë.

Putin deklaroi se takimi, ku morën pjesë edhe liderë nga India, Irani dhe Pakistani, kishte hedhur bazat për një sistem të ri ndërkombëtar që zëvendëson “modelet e vjetra eurocentrike e euro-atlantike”. 

Rusia, Kina dhe Koreja e Veriut forcojnë bashkëpunimin

Moska shpreson që shitja e gazit drejt Kinës të kompensojë humbjet nga sanksionet e vendosura nga BE pas pushtimit të Ukrainës. Sipas agjencive ruse, furnizimet mund të arrijnë në 106 miliardë metra kub në vit, ndjeshëm më pak se niveli i eksportit përpara luftës.

Nga ana e saj, Pekini do të hapë udhëtimin pa viza për qytetarët rusë duke nisur nga 15 shtatori.

Ndërkohë, për herë të parë që nga viti 1959, një lider i Koresë së Veriut do të marrë pjesë në një paradë kineze. Kim Jong Un pritet të shfaqet publikisht përkrah Xi dhe Putin, pasi Pheniani ka dërguar armë dhe trupa për luftën në Ukrainë.

Perëndimi mungon, Lindja forcon rreshtimin

Shumica e liderëve perëndimorë nuk do të marrin pjesë në paradë për shkak të kundërshtimit ndaj agresionit rus. Por Pekini nuk e ka dënuar Moskën për pushtimin dhe është akuzuar nga SHBA e aleatët se e ndihmon Rusinë me materiale me përdorim të dyfishtë dhe me blerje të naftës.

Tani, me Putinin dhe Kim në krah, Xi Jinping synon të tregojë fuqinë e tij si lider global, duke sfiduar hapur rendin e dominuar nga Perëndimi.

Përshtati nga BBC në shqip ©LAPSI.AL